Naxçıvan özünü dünya arenasında şahmat məkanı kimi tanıdıb

Mayın 1-də Naxçıvan şəhərində ulu öndər Heydər Əliyevin anadan olmasının 96-cı ildönümünə həsr edilən “Naxçıvan-2019” Beynəlxalq Şahmat Festivalı start götürüb.

AZƏRTAC-ın Naxçıvan bürosunun əməkdaşları Azərbaycan Şahmat Federasiyasının vitse-prezidenti Faiq Həsənovun, həmçinin festivalda iştirak edən zəka sahiblərinin bu mötəbər yarışla bağlı fikirlərini öyrəniblər.

Azərbaycan Şahmat Federasiyasının vitse-prezidenti Faiq Həsənov deyib: “Builki şahmat festivalı digərlərindən çox fərqlənir. Əvvəlcə onu deyim ki, başqa ölkələrdən gələn iştirakçılar Naxçıvanın necə qonaqpərvər bir diyar olduğunu görürlər. Nəticədə, digər şahmatçıların da bu festivala marağı ilbəil artır. Yüksək reytinqli şahmatçıların Naxçıvana gəlməsi, yarışda iştirak etməsi turnirin səviyyəsini ildən-ilə artırır. Etiraf edək ki, festival ilk dəfə təşkil olunarkən xeyli çətinliklər yaranmışdı, şahmatçıları bura dəvət etmək heç də asan olmamışdı. Çünki Naxçıvanı tanımırdılar və turnirin necə keçəcəyini bilmirdilər. İndi isə bütün şahmatçıların özləri bizə şahmat festivalında mübarizə aparmaq üçün müraciət edirlər. Biz bu festival barədə məlumat yaydıqdan dərhal sonra müraciətlər başlayır. Artıq deyə bilərəm ki, Naxçıvan özünü dünya arenasında şahmat məkanı kimi tanıdıb və FIDE-də ən reytinqli festivallardan biridir. Hazırda keçirilən festivalı digərlərindən fərqləndirən başqa cəhət əhatə dairəsinin genişlənməsidir. Belə ki, ilk dəfədir, bu festivalda Amerika Birləşmiş Ştatlarından şahmatçı da iştirak edir. Bildiyiniz kimi, ABŞ çempionatı çox güclüdür və orada ilk 10 pilləni tutan şahmatçılar beynəlxalq turnirlərdə, yarışlarda çıxış edirlər. Həmin şahmatçı da onlardan biridir”.

Qrossmeyster Urfan Sevdimalıyev qeyd edib ki, artıq 9-cu dəfədir, Beynəlxalq Şahmat Festivalında iştirak edir və bunların dördündə mükafatçılar sırasına düşüb: “Belə bir festivalın muxtar respublikada təşkil olunması möhtəşəm hadisədir. Biz şahmatçılar reytinqli turnirlərdə mübarizə apardıqca oyun təcrübəmiz artır. Belə bir mötəbər turnirin təşkilatçılarına minnətdarlığımı bildirirəm”.

Beynəlxalq usta Toğrul Həsənzadə fikirlərini bölüşərək deyib: “Bu festivalın başlamasını hər bir şahmatçı kimi, mən də səbirsizliklə gözləyirdim. Çünki Naxçıvanda təşkil olunan turnir şahmatçılarımızda bayram əhval-ruhiyyəsi yaradır. Burada iştirak etməklə təcrübəmizi artırırıq. Həm də digər ölkələrin şahmatçıları ilə dostluq münasibətləri qururuq. Belə bir festivalın keçirilməsi Naxçıvanda şahmata və şahmatçılara göstərilən diqqət və qayğının bariz nümunəsidir”.

FIDE ustası Pərviz Qasımov deyib ki, bu mötəbər festivalda kiçik yaşlarından iştirak edir: “Uzun illərdir ənənə halını alan bu turnir bir daha göstərir ki, Naxçıvanda şahmatın inkişafı üçün hər bir imkan yaradılıb. Builki festivalda uğur qazanıb muxtar respublikanın şahmat ənənələrini layiqincə davam etdirəcəyimə inanıram”.

“FIDE-nin reytinqində ən yaxşı festivallardan hesab olunan turnirdə iştirak etmək qürurvericidir. Festivalda “A” qrupunda mübarizə aparıram və burada dünyanın bir çox tanınmış şahmatçıları ilə qarşılaşacağam”, – deyən FIDE ustası Sadiq Məmmədov vurğulayıb ki, mükafatçılar sırasına düşmək üçün bütün qüvvəsini sərf edəcək. O, belə mötəbər festivalın keçirilməsinə görə təşkilatçılara minnətdarlığını bildirib.

Layihələr

previous arrow
next arrow
Slider

Xəbərlər arxivi

Ünvan: M.Mirqasımov 4 mənzil 42, Bakı, Azərbaycan, Tel./Faks: ( +994 12 ) 441 20 91

Email: azregion@gmail.com